Sarmaanyo.com » Somalia

Xukuumadda Federaalka oo Rajo ka muujisay meel marinta dastuurka

editor — Fri, 11 May 2012 16:07:04 +0000

Afhayeenka Xukuumada Soomaaliya ahna La Taliyaha Ra’iisul Wasaaraha Eng. C/raxmaan Yariisow ayaa sheegay in Xukuumada ay ka go’an tahay dhaqan gelinta dariiqada Nabada ee loogu yeero Road Map-ka.

“Xukuumada dadaal badan ayay ku bixineysa sidii Road Map-ka u dhaqan geli lahaa, rajo wanaagsan ayaan ka qabnaa in la ansixiyo Dastuurka, xilliga KMG laga baxo”ayuu yiri Eng. Yariisow oo la hadlay mid ka mid ah Idaacadaha Maxaliga ee Muqdisho.

Eng. Yariisow ayaa sheegay in laga gudbo marxalada kala guurka ee uu dalka ka jiro uu muhiimad u yahay shacabka Soomaaliyed, si loo helo Dowlad rasmi ah oo aan KMG aheyn, isagoo tilmaamay in ifafafaalahaas uu soo muuqdo.

Shirka 135-xubnood ee madax dhaqameedyada ayaa lagu soo xulayaa 825-xubnood oo qeybaha bulshada iyo dhaqanka ah, kuwaas oo ansixinaya Dastuurka qabyo qoraalka, isla markaana soo doorta Baarlamaan cusub oo bedela kii hore.

Siyaasiyiinta iyo qeybaha bulshada ayaa si adag uga biya diidanaa Dastuurka qabyo qoraalka, iyo Road Map-ka, kaasoo ay ku sheegeen in aanu ka turjumeyn danta Umada Soomaaliyed, hase ahaatee Wasaarada Dastuurka ayaa sheegtay in wax badan laga bedelay qaar ka mid ah qodobada ay xasaasiyada ka timid ee ku jira Dastuurka.

Guddoomiye Cusub Oo Maanta Loo Doortay Ururka Dhallinyarada Khaatumo SAWIRRO

editor — Fri, 11 May 2012 15:54:58 +0000

Muqdisho Urur dhalinyaro oo cusub lana magac baxay ururka Dhallinyrada Khaatumo ayaa Maanta looga dhawaaqay Muqdisho, iyadoo isla maantana loo doortay guddoomiye cusub oo hoggaamiya Ururkaasi.

Munaasabad ballaaran oo lagu qabtay xarunta ururka dhallinyarada qaranka Soomaaliyeed ayna ka qeybgaleen boqollaal dhalinyrao ah oo ka soo jeeda deegaannada maamulka Khaatumo, mas’uuliyiin ka socotay maamulkaasi, Salaadiin, mas’uuliyiinta ururka haweenka qaranka Soomaaliyeed, iyo marti sharaf kale ayaa maanta lagu qabtay xarunta ururka dhallinyrada qaranka Soomaaliyeed ee Muqdisho.

Ujeeddada kulankaasi ayaa aheyd sidii loo magacaabi lahaa ururka horumrinta dhalinyarada Khaatumo ee “Kheyda” isla markaana loogu dooran lahaa guddoomiye cusub, iyadoo munaasabadda ay hadaallo u badnaa dhiirigelin iyo bogaadin ka soo jeediyeen mas’uuliyiintii ka socotay maamulka Khaatumo oo uu ka mid ahaa Maxamed Ducaale Cabdi oo dhinaca Amniga u qaabilsan maamulka Khaatumo kaas oo muujiyay sida uu maamulkiisu u taageersanyahay dowladda KMG iyo qorshaha ansixinta dastuurka, isagoo ku dhiirigeliyay dhallinyarada in ay gundhig u noqdaan raadinta midnimada dhallinyarada Soomaaliyeed.

Muddadii ay socotay munaasabaddaasi ayaa lagu soo bandhigay suugaan ka tarjumeysay qiimaha ay bulshada u leedahay wadajirka iyo midnimada, waxaana halkaasi ka soo jeediyay Abwaan Maxamed Cabdi Faarax “Looyaan”

Intaasi kadib waxaa la gudagalay in loo codeeyo musharaxiintii isu soo taagtay xilka hoggaanka ururka horumarinta dhallinyrada Khaatumo,kuwaas oo ahaa ku dhawaan ilaa Shan xubnood, iyadoo musharax waliba uu soo bandhigay waxqabadkiisa mustaqbalka haddii la doorto.

Doorashada oo si deggan oo aan buuq laheyn ku dhamaatay ayaa waxaa ku guuleeystay in uu noqdo guddoomiyaha cusub ee ururka horumarinta dhallinyrada “Khaatumo” Aadan Maxamed jaamac oo ku magac dheer “Abuu walad” waxaana isla markii lagu dhawaaqay natiijada isqabsaday mashxarad, sacab iyo sawaxan, isagoo guddoomiyaha cusub uu u mahadceliyay dhalinyarada iyo mas’uuliyiintii ka qeybgashay xafladdaasi wuxuuna hoosta ka xariiqay in uu mudnaanta siin doonto mideynta dhallinyarada Khaatumo iyo in ay qeyb ka noqdaan ururka dhallinyarada qaranka Soomaaliyeed oo maanta xaruntiisa lagu qabtay doorashada.

Si kastaba ha ahaatee dhalinyaradu waa lafdhabarka bulshada waxeyna gacan ka geystaan barnaamijyada horumarineed ee dalka, iyadoo magacaabista ururkan iyo doorashada hoggaankiisaba loo arko in uu horseed u noqon karo mideynta dhalinyarada Soomaaliyeed si looga baxo dhibaatada ka jirta dalkeenna, inkastoo ay xusid mudantahay taariikhdii wanaagsaneyd ee dhallinyaradeenna Soomaaliyeed ay ku soo hooyeen neecaawda xornimo ee aynu maanta heysanno.

Madaxweynaha Jamhuuriyadda Oo Kormeeray Xarummo Ay Walaalaha Turkigu Mashaariic Ka Hirgelinayaan”DAAWO SAWIRRADA”

editor — Sun, 01 Apr 2012 05:30:11 +0000

Madaxweynaha Jamhuuriyadda Soomaaliya Mudane Sheekh Shariif Sheekh Axmed ayaa maanta kormeeray xarummo ay walaalaha Turkigu ka hirgelinayaan mashaariic kala duwan oo ku yaala magaalada Muqdisho.

Kormeerkan uu maanta sameeyey Madaxweyne Sheekh Shariif Sheekh Axmed oo ahaa mid uu ugu kuurgalayey qaabka ay u socdaan dhismooyin mashaariic ah oo walaalaha Turkigu ka hirgelinayaan gudaha magaalada Muqdisho ayaa Madaxweynuhu waxaa uu ugu horeyn ku tagey qaybo ka tirsan degmada Hodan.

Madaxweynaha ayaa waxa uu si gaar ah usoo eegay dhismooyin isugu jira Isbitaal,Colegge Waxbarasho iyo xarun loogu talagalay quudinta kuwaasi oo hada dhismahoodu ka socdo nawaaxiga warshadii Kabka ee degmada Hodan waxaana uu Madaxweynuhu indha indheeyey sida dhismayaashaasi ay u socdaan isagoo dhanka kalena warbixinno ka dhageystay mas’uuliyiin iyo injineero ka tirsan Turkiga oo uga warbixiyey halka ay howlahaasi mashaariicda lagu hirgelinayo marayaan.

Mudane Sheekh Shariif Sheekh Axmed Madaxweynaha Jamhuuriyadda oo markii uu kormeerkaasi soo gabagabeeyey kadib la hadlay saxaafadda ayaa ugu mahadceliyey dowladda aynu walaalaha nahay ee Turkiga sida hagar la’aanta ah ee ay mashaariicdaasi u hirgelinayaan waxaana uu Madaxweynuhu dhanka kale ugu baaqay shacabka Soomaaliyeed iney ka faa’ideystaan Mashaariicdaan horumarineed loona baahanyahay in danta gaarka ah laga hormariyo danta guud.

Magaalada Muqdisho ayaa waxaa xiligan ka soconaya mashaariic kala duwan oo dhismayaal horumarineed ah ayadoo kuwo kalena horey loo hirgeliyey balse kormeerkaan maanta uu Madaxweyne Sheekh Shariif Sheekh Axmed ku tagey goobaha mashaariicda laga hirgelinayo qaarkood ayaa ah mid lagu dar dar gelinayo hirgelinta mashaariicdaasi si shacabka Soomaaliyeed ay uga faa’ideystaan.

NAGA FILLO DHOWAAN SAWIRRADA GOOBAHA MASHAARIICDA LAGA FULINAYO EE MUQDISHO INSHA ALLAH

Maxaa ka jira inay ciidamada AMISOM duulaan ku yihiin Ceelasha Biyaha

editor — Thu, 29 Mar 2012 11:20:26 +0000

Muqdisho Warar ku dhow dhow Taliska Ciidamada AMISOM magaalada Muqdisho oo na soo gaaray ayaa sheegaya suuragalnimada in Ciidamadaasi weerar ay ku qaadaan Deegaanada loo barakacay ee duleedka Magaalada Muqdisho, gaar ahaan Ceelasha Biyaha iyo KM 13.
Ilo wareed lagu kalsoon yahay oo warkan ka helnay ayaa sheegay kullan Xalane ay ku yeesheen Saraakiisha Ciidamada AMISOM lagu go’aamiyey duulaan ay ku qaadaan Deegaanada KM 13, Garasbaalay, Siinka Dheer iyo Ceelasha Biyaha, halkaasoo ay maamulaan Xarakada Alshabaab oo ku dhaqanka shareecada Diinta Islaamka ka hirgalisay.
Dhaqdhaqaaq Ciidan oo aad u ballaaran ayay ka wadaan ciidamada Xarakada Alshabaab oo qorshaha AMISOM helay, waxayna Ciidamo aad u fara badan geeyeen wadada isku xirta Muqdisho iyo Afgooye.
Dhinaca kale dagaalo culus ayaa caawa habeenkii labaad Magaalada Muqdisho ku dhexmaraya Ciidamada AMISOM, kuwa Dowladda KMG Soomaaliya oo isku dhinac ah iyo Ciidamada Xarakada Alshabaab.
Rasaasta iyo madaafiicda aadka u xoogan oo ay is dhaafsanayeen labada dhinac ayaa laga maqlayay xaafadaha kala duwan ee gobolka Banaadir iyo waliba deegaanada duleedka Magaalada Muqdisho.
Dagaalada ugu culus Caaway waxay ka dhaceen Degaanada Xoosh, Kaxda iyo Ex Koontarool Afgooye ee Magaalada Muqdisho, waxaana weerarka dagaalka qaaday ciidamada Xarakada Alshabaab oo dagaal aan horay loo arag la galay Ciidamada AMISOM.
Si kasta oo ay ahaato xaalada deegaanada loo barakacay iyo deegaanada Magaalada muqdisho dagaalada ka dhaceen ayaa dagan, mana jiraan wax cabsi ah oo ay muujinayaan dadka shacabka ah ee ku nool deegaanadaasi

40-arday deeq Waxbarasho ka heshay dalka Ethiopia oo loo sameeyey Xaflad Sagootin ah (Sawiro)

editor — Thu, 27 Oct 2011 15:44:21 +0000

Garoowe Wasaaradda Waxbarashada Dowladda Puntland ayaa maanta xaflad sagootin ah u sameysay 40-arday oo deeq waxbarasho ka helay dalka Itoobiya.

Xaflada waxaa kasoo qaybgalay Madaxweyne kuxigeenka Puntland Gen.Cabdisamad Cali Shire,Wasiirka Waxbarashada Dr.Cabdi Faarax Juxa,Xildhibaano,Qunsulka Itoobiya ee Puntland iyo martisharaf kale.

Wasiirka Waxbarashada oo ka hadlay xaflada ayaa sheegay in ay tahay maalin taariikhi ah isla markaana ardaydaan ay wax kasoo baran doonaan ilaa 16-jaamacadood ku yaalla dalka Itoobiya ayna soo baran doonaan cilmi kala duwan.

Dowladda Itoobiya ayuu uga mahadceliyey deeqda ay siisay,waxaana uu kula dardaarmay dhamaan 40-ka arday ee maanta baxay in ay ka faa’ideystaan fursada ay heleen.

Madaxweyne Kuxigeenka Puntland ayaa ku amaanay Dowladda Itoobiya qaabka ay u taageerto Soomaalida,waxaana uu tilmaamay in Puntland iyo Itoobiya uu kala dhexeeyo Xirrir kala duwan oo ay kamid yihin Ganacsiga,Amaanka iyo Siyaasada.

Qaar kamid ah ardayda maanta loo qabtay xafladda sagootinta ayaa sheegay in ay ku faraxsanyihin fursada ay heleen,waxayna ballanqaadeen markii ay soo dhamaystaan waxbarashadooda ay wax u qaban doonaan dadkooda iyo dalkooda.

Sanadkii hore ayaa dalka Itoobiya sidoo kale loo diray 63-arday oo deeq waxbarashada helay oo ay Dowladda Itoobiya siisay Wasaaradda Waxbarashada.

Sarmanayo.com

Banaanbaxyo looga soo horjeedo Soo gelitaanka Ciidanka Kenya oo ka dhacay degaanada Al Shabaab

editor — Thu, 27 Oct 2011 15:35:54 +0000

Banaan baxyada ayaa ka dhacay Magaalada Jowhar, Ceelbuur, Marka iyo deegaanada duleedka ee loo barakacay, halkaasoo dadku ay meel fagaare ah isugu soo baxeen.

Gelinkii hore ee saaka ayaa gawaari cod baahiyeyaal lagu rakibay loogu sheegay dadka inay isugu soo baxaan, goobaha ganacsigana soo xiraan.

Banaan baxa ka dhacay Magaalada Jowhar ayaa waxaa meel fagaare ah kala hadlay Gudoomiyaha cusub ee Al-Shabaab ee Gobolka Shabellaha Dhexe Yuusuf Kaba-kudukade, isagoo ugu baaqay shacabka inay la dagaalamaan Kenya.

Dhinaca duleedka Muqdisho ayaa waxaa dadka fagaarayaasha kula hadlay Xasan Dahir iyo Abuu Mansuur oo si wada jir ah ku baaqay in lala dagaalamo Kenya oo ay sida warka u dhigeen ku soo duulay Soomaaliya.

Xasan Dahir oo hadlay ayaa sheegay in Kenya ay duulaan ku tahay, Shareecada Islaamka, Towxiidka, Quraanka Kariimka, isagoo tilmaamay in wax laga xumaado tahay inay ka soo gudbaan waxa uu ugu yeeray xuduud beenaadka.

Waxaa uu sheegay in waxa ugu qeyrka badan ee dadka ku dhiman karaan ay tahay in dagaalka la galo oo laga hortago duulaanka Kenya sida uu yiri.

Banaan baxyada ayaa waxaa dadkii ka qeyb galay ay ku qeylinayeen halku dhigyo ka dhan ah Dowladda Kenya iyo kuwa deriska ah.

Ciidammada Dowladda Oo Caawa La Wareegay Qooqaani

editor — Sat, 15 Oct 2011 21:07:32 +0000

Ciidammada Qalabka Sida ee Soomaaliya ee howlgallada ka waday gobollada Jubooyinka ayaa fiidnimadii caawa la wareegay deegaanka Qooqaani ee gobolka Jubada Hoose halkaasi oo ay horey u joogeen Maleeshiyada Kooxda Khawaarijta ah ee Al-Shabaab.

Saraakiil ka tirsan Ciidammada Dowladda oo ayaga oo ku sugan deegaanka Qooqaani ee gobolka Jubada Hoose ayaa xaqiijiyey in howlgalka ay Ciidammadu kula wareegayeen Qooqaani lagu guuleystay islamarkaana ay Ciidammadu hada xaqiijiyeen gacan ku heynta deegaankaasi iyo deegaannada kale ee ku xeeran ayada oo aan wax dagaal ah dhicin,Maleeshiyadii Shabaabka ee joogtayna ay halkaasi isaga carareen.

Wariye Maxamed Axmed Ilkacase oo ka mid ah Wariyeyaasha ka socda Warbaahinta Qaranka oo ku sugan Qooqaani ayaa soo sheegaya in dadka deegaanka ay si aad ah usoo dhoweeyeen Ciidammada Qalabka Sida markii ay halkaasi ka baacsadeen Maleeshiyada Shabaabka oo iyagu markii ay Ciidammada arkeen halkaasi isaga cararay.

La wareegidan ay hada Ciidammada Qalabka Sida ee Soomaaliya la wareegeen Qooqaani caawa ayaa qeyb ka ah guullo isdaba joog ah oo ay Ciidammada Dowladda ee ka howlgalaya gobollada Jubooyinka soo hooyeen saacadihii ugu dambeeyey waxaana howlgalladaasi ay qeyb ka yihiin Howlgallada dalka guud ahaanba looga sifeynayo Maleeshiyada Kooxda Al-Shabab.

xigaasho radiomuqdosho.net

Wasiirka Arrimaha Gudaha ee Dowladda Somaliya oo sheegay in dagaalada ay socon doonaan

editor — Tue, 11 Oct 2011 19:39:07 +0000

Dowladda Kmg ah ee Soomaaliya ayaa waxay weli ku baaqeysaa inay sii wadi doonto dagaalada culus ee ay kula jirto Xoogaga Xarakada Al Shabaab, waxayna sheegtay inay Shabaab ka saari doonto dalka oo dhan.

Wasiirka Arrimaha Gudaha ahna Amniga Qaranka ee Dowladda Kmg ah ee Soomaaliya Mudane C/Samad Macalin Maxamuud Sheekh Xasan, oo maanta booqasho ku tagay goobaha shalay laga saaray Xarakada Al Shabaab, ayaa wuxuu sheegay in dagaalada ay sii socon doonaan.

Wasiirka Arrimaha Gudaha ahna Amniga Qaranka ee Dowladda Kmg ah ee Soomaaliya, ayaa wuxuu hambalyo iyo bogaadinba uu u jeediyay Ciidamadda Xoogga Dalka Soomaaliyeed iyo Ciidamadda Midowga Afrika ee Amisom.

Wasiirka ayaa wuxuu sheegay in Dowladda Somaliya ay sii wadi doonto, dagaalada culus ee ay maanta kula jirto Xarakada Al Shabaab, wuxuuna Wasiirku uu sheegay inay dalka oo dhan ka saari doonaan.

Mudane Cabdi Samad ayaa wuxuu sheegay in shacabka Soomaaliyeed looga baahan yahay inay taageeraan Dowladda Kmg ah ee Soomaaliya, isla-markaana ugu baaqay inay soo sheegaan goobaha ay ku arkaan Ciidamadda Shabaab.

Raaisal Wasaare Gaas iyo Golaha Wasiirada oo maanta kullan culus ku yeeshay Madaxtooyada Somaliya War Saxaafadeed

editor — Tue, 11 Oct 2011 19:31:48 +0000

Shir ay maanta yeesheen Golaha Wasiirada oo uu shir-guddoominayey Ra’iisul Wasaaraha Soomaaliya Dr Cabdiweli Maxamed Cali Gaas ayaa looga hadlay arrimo dhowr ah oo ay ka mid yihiin warbixin safarkii Ra’iisul Wasaaraha, Qaraxii 4ta October, Qorshaha Qaranka ee Xasilinta Nabadgelyada (NSSP) iyo arrimaha badda. Golaha Wasiirada waxey maanta warbixin ka dhageysteen Ra’iisul Wasiiraha Soomaaliya Dr Cabdiweli Maxamed Cali ee safarkii shaqo ee uu ku tagey Qaramada Midoobey, Mareykanka, Canada, Denmark iyo Ethiopia. Ra’iisul Wasaarahu waxuu sheegay in safarkan uu ahaa mid guul iyo isafgarad ku soo dhamaaday oo caalamku ay aad ugu qanacsanaayeen horumarka dhanka amniga, gar-gaarka bani’aadanimo, xiriirka Dowladda Federalka iyo Maamulada dalka ka jira, dib-u-heshiisiinta iyo maamul wanaaga. Ra’iisul Wasaaraha ayaa sheegay in caalamku ay aad ugu soo gurmadeen arrimaha gar-gaarka bani’aadanimo, hase yeeshee uu caalamka kala soo hadlay sidii xal waara loogu heli lahaa oo ummadda soomaaliyeed loo soo gaarsiin lahaa mashaariic horumarineed oo soo celiya adeegyadii bulshada iyo nolol maalmeedkii shacabka soomaaliyeed. Ra’iisul Wasaaruhu waxuu sheegay in loo baahanyahay in Roadmap kii 6da September ay Soomaalidu saxiixdeen la dhaqangeliyo. Wasiir Ku xigeenka Arrimaha Gudaha iyo Amniga Qaranka iyo qubaro Soomaaliyeed ayaa laga dhageystay warbixin la xiriirta qabyo qoraalka Qorshaha Qaranka ee Xasilinta Nabadgelyada (NSSP), dood dheer ka dib waxaa la go’aamiyey in qabyo qoraalka lagu soo sameeyo saxitaan iyadoo la tixgalinayo macluumaadkii iyo fikradihii goobta laga soo jeediyey, isla markaana la soo ururiyo fikradaha Saraakiisha Soomaaliyeed, ka dibna wadatashi loogu gudbiyo ka soo qeybgalayaashii shirkii wadatashiga ahaa. Qabyo qoraalka Qorshaha Qaranka ee Xasilinta Nabadgeyada (NSSP) ayaa lagu soo celin doonaa golaha wasiirada si ay u ansixiyaan ka dibna loogu gudbiyo Baarlamaanka Soomaaliyeed. Wasiirka Kalluumeysiga, Qeyraadka Badda iyo Bey’ada iyo qubaro Soomaaliyeed ayaa laga dhageystay warbixin la xiriirta arrimaha Badda. Dood dheer ka dib golaha Wasiiradu waxey go’aamiyeen in arrimaha badda sida EEZ laga saaro dhammaan dokumentiyada sida Qorshaha Qaranka ee Xasilinta Nabadgelyada iyo Roadmapka. Wasiirka Garsoorka iyo Arrimaha Diinta ayaa sheegay inay wadaan dadaalo ay kula xiriirayaan eheladii iyo qaraabadii dadkii ku geeriyooday iyo kuwii ku dhaawacmay, si warbixin dhameystiran ay ugu soo gudbiyaan golaha wasiirada, sheegayna in Dowladda Turkiga ayaa qaaday 36 ka mid ah dhaawacii. Wasiirku waxuu sheegay inay arrimahooda u marayaan heer wanaagsan una mahadceliyey shacabka soomaaliyeed oo si wanaagsan ula shaqeeyey. Golaha Wasiiradu waxey kaloo go’aamiyeen in 8dii wasaaradood ay dib u howlgalaan loona saaray guddi ka soo talo bixiya 3 maalmood gudahood, iyagoo sheegay inaysan Al-Shabaab marnaba laga aqbaleynin inay hakad geliyaan u adeegidda shacabka Soomaaliyeed.

Midowga Yurub oo lacag ugu deeqay degaanada ay saameyn ku yeesheen Burcad badeednimada

editor — Sat, 08 Oct 2011 04:42:47 +0000

Ururka Midowga Yurub ayaa lacag malaayin doolar ugu deeqay degaanada ku yaalla dalka Soomaaliya oo ay saameyeen falalka Burcad badeednimada,waxaana ku jira wadamo ku yaalla Geeska Afrika.

Shir looga hadlayay arimaha Burcad badeeda oo kasocday magaalada London ee dalka Britain ayaa lasoo gaba gabeeyey maanta,waxaana ka qaybgalay masuuliyin kasocotay maamulada ka jira dalka.

Agaasimaha Waaxda la dagaalanka Burcad badeeda ee Wasaaradda Dekaddaha iyo Gaadiidka Badda Puntland C/risaaq Duceysane oo ka qaybgalay kulanka ayaa u sheegay BBC-da in lacag gaaraysa 27-milyan oo Euro ah loogu deeqay wadamada ay saameyeen Burcad badeednimada ee ku yaalla Geeska Afrika.

Wuxuu intaas ku daray 12-milyan oo kamid ah lacagtaas loogu talo galay dalka Soomaaliya,waxaana uu tilmaamay in ay maamuli doonto Urur goboleedka IGAD.

C/risaaq Duceysane ayaa intaas ku daray in dhamaan degaanadii ay saameyn ku yeesheen kooxaha Burcad badeeda laga hirgeli doono mashaariic horumarineed oo wax u tarta dadka degan.

Barnaamijkaan cusub ayaa noqonaysa midkii u horeeyey Ururka Midowga Yurub ka hirgeliyo wadamada ay saameyeen kooxaha Burcad badeeda gaar ahaan Soomaaliya,waxaana xeebaha Soomaaliya ku sugan Maraakiib dagaal oo kasocda Midowga Yurub oo ka qaybgalaaya howlgalka la dagaalanka Burcad badeeda iyagoo ku howlgala magaca EUNAVFOR.