Geelle iyo Walad

Jabuuti, Wakiilkii hore ee Qaramada Midoobay u qaabilsanaa arrimaha Soomaaliya Axmed Walad Cabdala ayaa magaalada Jabuuti ee caasimada dalka Jabuuti kulan kula yeeshay Madaxweynaha dalkaasi mudane Ismaaciil Cumar Geelle, kaasoo ay kaga wada hadleen arrimo quseeya dalka Soomaaliya.

Wakiilkii hore ee Xoghayaha Guud ee Qaramada Midoobay u qaabilsanaa arrimaha Soomaaliya Axmedu Walad Cabdala ayaa isagoo ku sugan magaalada Jabuuti ee caasimada dalka Jabuuti, waxaa uu kulan la qaatay Madaxweynaha dalkaasi mudane Ismaaciil Cumar Geelle, kulanka ayaa waxaa ay kaga wada hadleen arrimo ay u badnaayeen arrinta Soomaaliya iyo sidii xal looga gaari karo xaaladdaha murugsan ee ka taagan gudaha dalka Soomaaliya.

Axmedu Walad Cabdala ayaa kula dardaarmay Madaxweynaha dalka Jabuuti mudane Ismaaciil Cumar Geelle in uusan marnaba ka daalin wax u qabashada umada Soomaaliyeed, wuxuuna ku amaanay Madaxweynaha dalka Jabuuti qaabkii uu u dhexdhexaadiyay dhinacyadii isku hayay Siyaasada dalka Soomaaliya, taasoo ay ugu danbeyntii ka dhalatay dowladda uu haatan Madaxweynaha ka yahay mudane Sh. Shariif Sh. Axmed.

Sarmaanyo.com

Burcad-baddeed

Jabuuti Shir looga hadlayay arrimaha burcad baddeeda oo ka socday magaalada Jabuuti ee caasimada dalka Djabuuti ayaa lagu soo gabagabeeyay halkaasi, iyadoo bayaana laga soo saarey.

Shirkaas ayaa waxaa ka soo qeybgaley masuuliyiin ka socotay dowladda Soomaaliya, kuwa ka socday maamul gobaleedyadaPuntland iyo Somaliland iyo masulliyiin ka socotay beesha Caalamka, waxayna dhamaan madaxdii ka soo qeybgashay shirkaas si weyn uga doodeen dhibaatooyinka burcad baddeedu ku hayso gadiidka isticmaala biyaha Soomaaliya iyo arrimo kale oo ay ka mid yihiin tahriibinta dadka sharci la’aanta ah, joojinta kaluumaysiga sharci darada ah, in wax laga qabto wasaqeynta biyaha Soomaaliya iyo hakinta mukhaadaraadka la marsiiyo badda Soomaaliya.

Afhayeenka dowladda Soomaaliya mudane C/qaadir Maxamuud Walaayo oo ka mid ahaa ka qeybgalayaashii kulankaas oo u waramaayay warbaahinta ayaa sheegay in ujeedada kulankaasi uu ahaa sidii la isaga kaashan lahaa burcad baddeeda, islamarkaana la isu dhaafsan lahaa macluumaadka ku aadan dhaqdhaqaaqyada burcad baddeeda ka sameeyaan badda.

Afhayeenka ayaa waxaa uu intaasi raaciyey in shirkaasi laga soo saarey qodobo muhiim ah oo ku saabsan sidii wax looga qaban lahaa burcad baddeeda oo uu ugu horeeyo, in la dayactiro xabsiyadda gudaha Soomaaliya ku yaala, si loogu hayo dadka lagu helo iyagoo gacmaha kula jira falalkaas, wuxuuna sheegay in la isku afgartey dhamaan waxyaabihii looga hadlay kulankaas.

Ma ahan markii ugu horeysay ee la qabto kulan looga hadlayo arrimaha burcad baddeeda, waxaana kulan sidoo kale looga hadlayo arrimaha burcad baddeeda lagu qabtey 28-dii bishan magaalada Newyork ee dalka Mareykanka.

Mas'uulyiinta Midowga Africa - Addis Ababa (31ka Jannaayo, 2010)

Guddoomiyaha gudiga Ururka Midowga Afrika Mr. John Pean ayaa uga mahadceliyay go’aanka ay dowladda Jabuuti ku gaartey in ay Soomaaliya ciidamo ugu soo dirto, isagoo sheegay in Midowga Afrika uu soo dhaweynayo go’aankaas.

Mr. John Pean ayaa hadalkan ka jeediyay kadib markii uu shir kula yeeshay Madaxweynaha dalka Jabuuti mudane Ismaaciil Cumar Geelle, wuxuuna sheegay in go’aankaasi uu qiimo weyn ku fadhiyo marka loo eego xaaladda cakiran ee ka jirta gudaha dalka Soomaaliya.

Mr. John Pean wuxuu ku amaanay dowladda Jabuuti doorka firfircoon ee ay ka soo qaadatay xal u helida arrimaha Soomaaliya, gaar ahaan shirarkii dib u heshiisiinta Soomaaliya, iyadoo marti gelisay shirkii lagu soo dhisay dowladda KMG ah ee Soomaaliya, kaasoo lagu soo doortay Madaxweynaha dowladda KMG ah ee Soomaaliya mudane Sh. Shariif Sh. Axmed.